வள்ளலார் பெருவெளி போராட்டம்: 163 பேர் மீதான வழக்குகளைத் திரும்பப் பெறக் கோரிக்கை!

வள்ளலார் பெருவெளி காக்கப் போராடிய பார்வதிபுரம் மக்கள் மீது பதிவு செய்யப்பட்ட வழக்குகளைத் திரும்பப் பெற வேண்டும்!

அறநிலையத்துறை மற்றும் சட்டத்துறை அமைச்சர்களுக்குப் பார்வதிபுரம் பார்த்திபன் கடிதம்!

தமிழ் ஊடகம் | வடலூர் | 13.10.2026

வடலூர் வள்ளலார் சத்திய ஞானசபை பெருவெளியைப் பாதுகாக்கப் போராடிய பார்வதிபுரம் கிராம மக்கள் மீது முந்தைய திமுக ஆட்சியில் பதிவு செய்யப்பட்ட வழக்குகளைத் திரும்பப் பெற வேண்டும் என்ற கோரிக்கை மீண்டும் எழுந்துள்ளது.

வள்ளலார் சர்வதேச மையத் திட்டத்திற்கு எதிராகப் போராடிய பார்வதிபுரம் கிராம மக்களின் கோரிக்கைகளை முன்வைத்து, பார்வதிபுரத்தைச் சேர்ந்த எல்.என்.எம்.கே. பார்த்திபன் இந்து சமய அறநிலையத்துறை அமைச்சருக்குக் கடிதம் அனுப்பியுள்ளார்.

163 பேர் மீது வழக்குகள்!

முந்தைய திமுக ஆட்சியில் சுமார் ரூ.100 கோடி மதிப்பீட்டில் வடலூர் சத்திய ஞானசபை பெருவெளியில் வள்ளலார் சர்வதேச மையம் அமைக்கும் திட்டம் அறிவிக்கப்பட்டது. முதற்கட்டமாக ரூ.20 கோடி ஒதுக்கப்பட்டு, கட்டுமானப் பணிகளுக்கான நடவடிக்கைகள் தொடங்கப்பட்டன.

இத்திட்டம் வள்ளலாரின் பெருவெளித் தன்மையைப் பாதிக்கும் என்று பார்வதிபுரம் கிராம மக்களும் சன்மார்க்க அன்பர்களும் எதிர்ப்புத் தெரிவித்தனர்.

கட்டுமானப் பணிகளுக்காகத் தோண்டப்பட்ட பள்ளங்களில் இறங்கியும் கிராம மக்கள் போராட்டம் நடத்தினர். மக்களவைத் தேர்தலைப் புறக்கணிக்கப் போவதாக அறிவித்து வீடுகளில் கருப்புக் கொடிகளையும் ஏற்றினர். பின்னர் குறிஞ்சிப்பாடி வட்டாட்சியர் நடத்திய பேச்சுவார்த்தையைத் தொடர்ந்து தேர்தல் புறக்கணிப்புப் போராட்டம் கைவிடப்பட்டது.

இந்தப் போராட்டங்கள் தொடர்பாகப் பார்வதிபுரம் கிராமத்தைச் சேர்ந்த 163 பேர் மீது வழக்குகள் பதிவு செய்யப்பட்டதாகவும், அவர்களில் பெரும்பாலானோர் பெண்கள் என்றும், 20 பேர் மீது பிணையில் வெளிவர முடியாத பிரிவுகளில் வழக்குகள் பதிவு செய்யப்பட்டதாகவும் பார்த்திபன் தனது கடிதத்தில் தெரிவித்துள்ளார்.

106 ஏக்கர் நிலம் வழங்கிய பார்வதிபுரம் மக்கள்!

வள்ளலார் வடலூருக்கு வந்தபோது, பார்வதிபுரம் கிராம மக்கள் அவரது சன்மார்க்கக் கருத்துகளை ஏற்றுக்கொண்டு தங்களுக்குச் சொந்தமான 106 ஏக்கர் நிலத்தை வழங்கியதாகக் கடிதத்தில் குறிப்பிடப்பட்டுள்ளது.

1867ஆம் ஆண்டு சத்திய தருமச்சாலையும், 1872ஆம் ஆண்டு சத்திய ஞானசபையும் உருவான வரலாற்றுடன் பார்வதிபுரம் மக்களுக்குத் தொடர்பு இருப்பதாகவும் பார்த்திபன் சுட்டிக்காட்டியுள்ளார்.

1938ஆம் ஆண்டு இந்து சமய அறநிலையத்துறை நிர்வாகத்திடம் ஒப்படைக்கப்பட்டபோது 106 ஏக்கர் நிலம் இருந்ததாகவும், தற்போது சுமார் 74 ஏக்கர் மட்டுமே நிர்வாகத்தின் கைவசம் இருப்பதாகவும், மீதமுள்ள சுமார் 30 ஏக்கர் நிலம் ஆக்கிரமிப்பில் இருப்பதாகவும் அவர் தெரிவித்துள்ளார்.

சர்வதேச மையத் திட்டம் கைவிடப்பட்டதற்கு நன்றி!

ஜோசப் விஜய் தலைமையிலான புதிய அரசு பொறுப்பேற்ற பின்னர், வள்ளலார் பற்றாளர்களின் கருத்துகளை ஏற்று சர்வதேச மையத் திட்டம் கைவிடப்படுவதாக நீதிமன்றத்தில் தெரிவிக்கப்பட்டதற்குப் பார்த்திபன் நன்றி தெரிவித்துள்ளார்.

அதேவேளையில், பெருவெளியைப் பாதுகாக்கப் போராடிய கிராம மக்கள் மீதான வழக்குகளையும் திரும்பப் பெற நடவடிக்கை எடுக்க வேண்டும் என்ற கோரிக்கை முன்வைக்கப்பட்டுள்ளது.

பார்த்திபன் முன்வைத்துள்ள எட்டு கோரிக்கைகள்!

1. பெருவெளியில் மேற்கொள்ளப்படும் பணிகள் குறித்து பார்வதிபுரம் கிராம மக்களிடம் கருத்துக் கேட்புக் கூட்டம் நடத்த வேண்டும்.

2. ஆக்கிரமிப்பில் உள்ளதாகக் கூறப்படும் சுமார் 30 ஏக்கர் நிலத்தை மீட்க வேண்டும்.

3. சாதி, சமய, மத வேறுபாடுகளுக்கு அப்பாற்பட்ட வள்ளலாரின் சன்மார்க்கக் கொள்கைகளைப் பாதுகாக்கத் தனி வாரியம் அமைக்க வேண்டும்.

4. வடலூரை மதுக்கடைகள், மாமிசக் கடைகள் மற்றும் அசைவ உணவகங்கள் இல்லாத புனித நகரமாக அறிவிக்க வேண்டும்.

5. கடலூரில் வள்ளலார் வழக்கிற்காக ஆஜரான நீதிமன்ற வளாகத்தைப் புதுப்பித்து மக்கள் பார்வைக்குக் கொண்டுவர வேண்டும்.

6. வள்ளலார் எழுதிய நூல்கள் மற்றும் பயன்படுத்திய உடைமைகளை மீட்டெடுத்துப் பாதுகாக்க வேண்டும்.

7. வள்ளலாருக்கு நிலம் வழங்கிய பார்வதிபுரம் கிராம முன்னோர்களின் வாரிசுகளை அரசு சார்பில் கௌரவிக்க வேண்டும்.

8. அக்டோபர் 5ஆம் தேதி வள்ளலார் வருவிக்கவுற்ற நாளை இந்து சமய அறநிலையத்துறை சார்பில் கொண்டாட வேண்டும்.

போராட்ட வழக்குகள் திரும்பப் பெறப்படுமா?

வள்ளலார் பெருவெளியைப் பாதுகாக்கும் நோக்கில் போராடிய மக்களின் கருத்துகளை ஏற்று சர்வதேச மையத் திட்டம் கைவிடப்பட்டுள்ள நிலையில், அந்தப் போராட்டங்கள் தொடர்பாகப் பதிவு செய்யப்பட்ட வழக்குகளின் நிலை என்ன என்ற கேள்வியும் எழுகிறது.

பெருவெளியைப் பாதுகாக்க முன்வந்த மக்களின் கோரிக்கையை அரசு ஏற்றுக்கொண்ட பிறகும், அவர்கள் மீது பதிவு செய்யப்பட்ட போராட்ட வழக்குகள் தொடர வேண்டுமா?

பார்வதிபுரம் மக்களின் வரலாற்றுத் தொடர்பு, நில உரிமை சார்ந்த கோரிக்கைகள், சன்மார்க்க அன்பர்களின் எதிர்பார்ப்புகள் ஆகியவற்றைக் கருத்தில் கொண்டு அரசு நடவடிக்கை எடுக்க வேண்டும் என்பதே பார்த்திபனின் கடிதம் வலியுறுத்தும் மையக் கருத்தாக அமைந்துள்ளது.