வடலூர் பெருவெளியில் இன்னும் ஏன் பள்ளங்கள்? அக்டோபர் 5-க்குள் அகற்றுமா அறநிலையத்துறை?

-வளர்மெய்யறிவான் (எ) விசுவா விசுவநாத், ஆசிரியர் : தமிழ் ஊடகம்

வள்ளலார் பிறந்த நாள், மாதப் பூசம், புதிய கொடிமரத்தில் கொடியேற்றம் — முப்பெரும் நிகழ்வுகளை எதிர்நோக்கும் வடலூர்.

வரும் அக்டோபர் 5 (2026) வடலூருக்கு முக்கியமான நாள். வள்ளலாரின் பிறந்த நாள் அன்று வருகிறது; 2026 அக்டோபர் 5 அன்று பூச நட்சத்திரமும் அமைவதாக நாள்காட்டித் தகவல்கள் தெரிவிக்கின்றன.

இந்தச் சூழலில் வடலூர் சத்திய ஞானசபை பெருவெளியின் தற்போதைய நிலை மீண்டும் முக்கியமான கேள்வியாக எழுகிறது.

வள்ளலார் சர்வதேச மையம் அமைப்பதற்காக பெருவெளியில் மேற்கொள்ளப்பட்ட கட்டுமானப் பணிகளுக்கு எதிராகத் தொடரப்பட்ட வழக்கில் முக்கியமான மாற்றம் ஏற்பட்டுவிட்டது. பெருவெளிக்குள் கட்டுமானம் மேற்கொள்ளும் முந்தைய திட்டம் கைவிடப்பட்டதாக தமிழக அரசு நீதிமன்றத்தில் தெரிவித்துள்ளது. அதற்குப் பிறகு, “சத்திய ஞானசபையின் பெருவெளி, பெருவெளியாகவே பாதுகாக்கப்படும்” என்றும் இந்து சமய அறநிலையத்துறை சென்னை உயர்நீதிமன்றத்தில் உறுதியளித்துள்ளது.

அப்படியானால் இயல்பாகவே ஒரு கேள்வி எழுகிறது.

இன்னும் ஏன் பள்ளங்கள் மூடப்படவில்லை?

சர்வதேச மையக் கட்டுமானத்துக்காக பெருவெளியில் தோண்டப்பட்ட பள்ளங்களை மூடி, அந்த இடத்தைப் பழைய நிலைக்குக் கொண்டுவர வேண்டும் என்று உயர்நீதிமன்றம் உத்தரவிட்டிருப்பதாக ஆகஸ்ட் 28 நீதிமன்ற விசாரணை குறித்த செய்தியும் தெளிவாகப் பதிவு செய்கிறது.

அப்படியிருக்க, அந்தப் பள்ளங்கள் இன்னும் முழுமையாக மூடப்படாமல் இருந்தால் அதற்கான காரணத்தை அறநிலையத்துறை வெளிப்படையாக விளக்க வேண்டாமா?

திட்டமே கைவிடப்பட்டுவிட்ட நிலையில், அதற்காகத் தோண்டப்பட்ட பள்ளங்களை வைத்திருப்பதற்கான தேவை என்ன?

அதிலும் வள்ளலாரின் பிறந்த நாள் உள்ளிட்ட முக்கிய நிகழ்வுகளுக்காக ஏராளமான சன்மார்க்க அன்பர்கள் பெருவெளியில் கூடவிருக்கும் நிலையில், அந்த இடத்தை அதன் இயல்பான திறந்தவெளி நிலைக்கு மீட்டெடுப்பது அறநிலையத்துறையின் உடனடிக் கடமையாக இருக்க வேண்டாமா?

தகரத் தகடுகள் குறித்தும் விளக்கம் தேவை!

இதில் இன்னொரு சர்ச்சையும் இருக்கிறது.

ஆகஸ்ட் மாத நீதிமன்ற விசாரணையில், “பெருவெளியைச் சுற்றி அமைக்கப்பட்டிருந்த இரும்புத் தகடுகள் சேதப்படுத்தப்பட்டுள்ளன; இதுகுறித்து காவல்துறையில் புகார் அளிக்கப்பட்டுள்ளது” என்று அறநிலையத்துறை தரப்பில் தெரிவிக்கப்பட்டதாக செய்தி வெளியாகியுள்ளது.

ஆனால் பெருவெளியைப் பாதுகாக்கப் போராடுபவர்கள் தரப்பில் வேறொரு கேள்வி எழுப்பப்படுகிறது:

அந்தத் தகரத் தகடுகள் உண்மையில் பெருவெளியைச் சுற்றி அமைக்கப்பட்டவையா?

அல்லது கட்டுமானத்துக்காகத் தோண்டப்பட்ட பள்ளங்கள் மற்றும் கட்டுமானப் பகுதியை மறைக்க அமைக்கப்பட்டவையா?

இது வெறும் வார்த்தை வேறுபாடு அல்ல.

நீதிமன்றத்தில் அளிக்கப்பட்ட தகவலின் துல்லியம் தொடர்பான கேள்வி.

அக்டோபர் 5-க்கு முன்பு செய்ய வேண்டியது எளிமையானது!

பெருவெளிக்குள் கட்டுமானம் இல்லை என்று அரசு கூறிவிட்டது.

“பெருவெளி, பெருவெளியாகவே பாதுகாக்கப்படும்” என்று நீதிமன்றத்திலேயே அறநிலையத்துறை உறுதியளித்துவிட்டது.

அப்படியானால் அதைச் செயலிலும் காட்ட வேண்டும்.

+ கட்டுமானப் பகுதிகளை மறைத்திருக்கும் தகரத் தடுப்புகளை அகற்ற வேண்டும். + தோண்டப்பட்ட பள்ளங்களைப் பாதுகாப்பாக மூட வேண்டும்.

+ கட்டுமானக் கழிவுகள் இருந்தால் அகற்ற வேண்டும்.

+ பெருவெளியை அதன் இயல்பான திறந்தவெளி நிலைக்குக் கொண்டுவர வேண்டும்.

அக்டோபர் 5 அன்று வள்ளலாரை நினைவுகூர வடலூருக்கு வரும் சன்மார்க்க அன்பர்கள் பார்க்க வேண்டியது பாதியில் நிறுத்தப்பட்ட கட்டுமானத்தின் அடையாளங்களை அல்ல.

வள்ளலார் விட்டுச் சென்ற பெருவெளியை — பெருவெளியாகத்தான்!