வள்ளலார் பெருவெளி வழக்கு: சர்வதேச மையத் திட்டம் கைவிடப்பட்டது முதல் இதுவரை உயர்நீதிமன்றம் கூறியது என்ன?

-தமிழ் ஊடகம் சிறப்புக் கட்டுரை

வடலூர் வள்ளலார் பெருவெளியில் சர்வதேச மையம் அமைக்கும் தமிழக அரசின் திட்டத்திற்கு எதிராகத் தொடரப்பட்ட வழக்குகள், கடந்த சில மாதங்களில் முக்கியமான திருப்பங்களைச் சந்தித்துள்ளன.

குறிப்பாக, பெருவெளியில் சர்வதேச மையம் கட்டும் திட்டத்தைக் கைவிடுவதாக அரசு சென்னை உயர்நீதிமன்றத்தில் தெரிவித்த பிறகு என்ன நடந்தது? நீதிமன்றம் அடுத்தடுத்து என்ன உத்தரவுகளைப் பிறப்பித்தது? 106 ஏக்கர் நிலம் தொடர்பான விவகாரம் தற்போது எந்த நிலையில் உள்ளது?

வாசகர்கள் எளிதில் புரிந்துகொள்ளும் வகையில் நீதிமன்ற உத்தரவுகளைத் தேதி வாரியாகப் பார்க்கலாம்.

30 ஜூலை 2026: பெருவெளியில் சர்வதேச மையம் கட்டும் திட்டம் கைவிடப்பட்டது

W.P.Nos.9141, 8190, 29630 & 13325 of 2024 ஆகிய வழக்குகளை நீதிபதிகள் டாக்டர் G. ஜெயச்சந்திரன், S. சவுந்தர் அமர்வு விசாரித்தது.

இந்த விசாரணையில்தான் மிக முக்கியமான திருப்பம் ஏற்பட்டது.

பெருவெளியில் சர்வதேச மையம் அமைக்கும் முந்தைய திட்டம் கைவிடப்பட்டுவிட்டதாக அரசுத் தரப்பில் நீதிமன்றத்தில் தெரிவிக்கப்பட்டது.

புதிய திட்டம் பெருவெளிப் பகுதியில் எந்தக் கட்டுமானமும் இல்லாத வகையில் மாற்றப்படும் என்றும் கூறப்பட்டது.

அதேநேரத்தில், பெருவெளியின் சுற்றுப்புற விளிம்புப் பகுதியில் (periphery) சத்திய ஞானசபையின் தோற்றத்திற்கும் ஜோதி தரிசனத்திற்கும் இடையூறு ஏற்படாத வகையில் விவகார சாலை/நூலகம், யோக சாலை போன்ற வசதிகளை அமைப்பதற்கான மாற்றுத் திட்டம் அரசின் ஒப்புதலுக்கு அனுப்பப்பட்டுள்ளதாகவும் தெரிவிக்கப்பட்டது.

இதனுடன் வள்ளலார் தெய்வ நிலையத்தின் வசமுள்ள 71.26 ஏக்கர் நிலத்தை ஆக்கிரமிப்பிலிருந்து பாதுகாக்க வேலி அல்லது சுற்றுச்சுவர் அமைக்கும் பணியை உடனடியாகத் தொடங்க வேண்டும் என்றும் நீதிமன்றம் அறிவுறுத்தியது.

இதன் மூலம் பெருவெளிக்குள் சர்வதேச மையம் கட்டுவது என்ற முந்தைய திட்டம் முடிவுக்கு வந்தது. ஆனால் பெருவெளியின் “விளிம்பு” என்று அரசு குறிப்பிடும் பகுதியில் மாற்றுக் கட்டுமானங்கள் அமைக்கும் திட்டம் தொடர்ந்தது.

11 ஆகஸ்ட் 2026: “பெருவெளி பாதிக்கப்படவில்லை”

அடுத்த முக்கிய உத்தரவு N.D. Muruganandham v. Chief Secretary – W.P.No.11930 of 2024 வழக்கில் வந்தது.

இதிலும் அரசு தனது மாற்றப்பட்ட நிலைப்பாட்டை நீதிமன்றத்தில் பதிவு செய்தது.

பெருவெளியில் சர்வதேச மையம் அமைக்கும் முன்மொழிவு மறுபரிசீலனை செய்யப்பட்டுவிட்டதாகவும், பெருவெளியின் விளிம்புப் பகுதியில் மாற்றுத் திட்டம் பரிசீலிக்கப்பட்டு வருவதாகவும் தெரிவிக்கப்பட்டது.

குறிப்பாக,

“Peruveli area has not been disturbed”

என்ற அரசுத் தரப்பின் நிலைப்பாட்டையும் நீதிமன்றம் பதிவு செய்தது.

அறங்காவலர்கள் நியமனம் தொடர்பான கோரிக்கை இடைப்பட்ட நிகழ்வுகளால் பயனற்றதாகிவிட்டதாகக் கூறி அந்தப் பொதுநல வழக்கு முடித்து வைக்கப்பட்டது.

10 செப்டம்பர் 2026: 106 ஏக்கர் விவகாரம் முக்கியத்துவம் பெற்றது

செப்டம்பர் 10 அன்று மீண்டும் W.P.Nos.9141, 8190, 29630 & 13325 of 2024 வழக்குகள் நீதிபதிகள் டாக்டர் G. ஜெயச்சந்திரன், E. மனோகரன் அமர்வில் விசாரணைக்கு வந்தன.

இந்த உத்தரவில்தான் கட்டுமானப் பிரச்சினையைத் தாண்டி வள்ளலார் தெய்வ நிலையத்தின் மொத்த நிலப்பரப்பு முக்கிய விவகாரமாக முன்னுக்கு வந்தது.

சத்திய ஞானசபைக்கு சுமார் 106 ஏக்கர் நிலம் இருப்பதாக மனுதாரர்கள் தரப்பில் முன்வைக்கப்பட்டதையும், தற்போது சுமார் 74 ஏக்கர் நிலம் மட்டுமே மீட்கப்பட்டு அல்லது நிர்வாகக் கட்டுப்பாட்டில் இருப்பதாகக் கூறப்பட்டதையும் நீதிமன்றம் பதிவு செய்தது.

மீதமுள்ள சுமார் 30 ஏக்கர் நிலம் தொடர்பாக ஆக்கிரமிப்பு மற்றும் உரிமைக் கோரல்கள் இருப்பதும் நீதிமன்றத்தின் கவனத்திற்குக் கொண்டுவரப்பட்டது.

ஆக்கிரமிப்பு என்று கூறப்படும் நிலங்களுக்கு என்ன உத்தரவு?

இதில் நீதிமன்றம் முக்கியமான நடைமுறையை வகுத்தது.

மாவட்ட ஆட்சியரின் அறிக்கையின் அடிப்படையில் சபைக்குச் சொந்தமான நிலத்தில் இருப்பதாக அடையாளம் காணப்பட்டவர்களுக்கு இந்து சமய அறநிலையத்துறை தனித்தனியாக நோட்டீஸ் வழங்க வேண்டும்.

அவர்களிடம் நிலத்திற்கான உரிமை ஆவணங்கள் இருந்தால் அவற்றைச் சமர்ப்பிக்கப் போதுமான வாய்ப்பு வழங்க வேண்டும்.

அதன் பின்னரே சட்டப்படி விசாரணை நடத்தி முடிவெடுக்க வேண்டும்.

இந்த நடைமுறையை நான்கு மாதங்களுக்குள் முடிக்க வேண்டும் என்றும் உயர்நீதிமன்றம் உத்தரவிட்டது.

இதன் பொருள், ஆக்கிரமிப்பு என்று கூறப்படுபவர்களை விசாரணையின்றி வெளியேற்றுமாறு நீதிமன்றம் கூறவில்லை. நோட்டீஸ் → ஆவணங்களைச் சமர்ப்பிக்க வாய்ப்பு → விசாரணை → சட்டப்படியான முடிவு என்ற நடைமுறையைப் பின்பற்ற வேண்டும் என்று கூறியுள்ளது.

சுமார் 74 ஏக்கருக்கு வேலி

அதே விசாரணையில் தற்போது கட்டுப்பாட்டில் இருப்பதாகக் கூறப்பட்ட சுமார் 74 ஏக்கர் நிலத்தைச் சுற்றி வேலி அமைப்பது குறித்தும் விவாதிக்கப்பட்டது.

மேலும், பெருவெளியின் விளிம்பில் முன்மொழியப்பட்டுள்ள மாற்றுக் கட்டுமானங்கள் தொடர்பாக அரசின் முடிவு செப்டம்பர் மாத இறுதிக்குள் எடுக்கப்படும் என்று அரசுத் தரப்பில் தெரிவிக்கப்பட்டது.

இதனால் பெருவெளியில் சர்வதேச மையம் கட்டும் பழைய திட்டம் கைவிடப்பட்டிருந்தாலும், “பெருவெளியின் விளிம்பு” என்று அரசு குறிப்பிடும் பகுதியில் என்ன கட்டப்படும்? எந்த இடத்தில் கட்டப்படும்? என்ற கேள்வி தொடர்ந்து நிலைத்திருக்கிறது.

வேலி சேதப்படுத்தப்பட்டது: காவல்துறை விசாரணைக்கும் உத்தரவு

ஏற்கெனவே அமைக்கப்பட்ட வேலி சேதப்படுத்தப்பட்டதாக HR&CE தரப்பில் நீதிமன்றத்தின் கவனத்திற்குக் கொண்டுவரப்பட்டது.

இதுதொடர்பாக அளிக்கப்பட்ட புகாரின் மீது உரிய நடவடிக்கை எடுக்கப்படவில்லை என்று தெரிவிக்கப்பட்டதைத் தொடர்ந்து, கடலூர் மாவட்ட காவல் கண்காணிப்பாளர், DSP பதவிக்குக் குறையாத அதிகாரியை நியமித்து விசாரணை நடத்த வேண்டும் என்றும் உயர்நீதிமன்றம் உத்தரவிட்டது.

ஆனால், இந்த "வேலி சிதைப்பு" தொடர்பாக இந்து சமய அறநிலையத் துறையினர் நீதிமன்றத்தில் தவறான ஒரு தகவலை அளித்திருக்கிறார்கள் என்கிறார்கள் வடலூர் மக்கள்.

இந்து சமய அறநிலையத்துறை குறிப்பிடும் அது வேலி அல்ல. தகரத் தடுப்புகள். அந்தத் தகரத் தடுப்புகள் பெருவெளியில் நட்டநடுவே "சர்வதேச மையக் கட்டடம் கட்டத் தோண்டப்பட்ட பள்ளங்களை தற்காலிகமாக மூடிவைக்க நீதிபதி வாய்மொழியாகக் கூறியவை.

அது பெருவெளியை சுற்றியுள்ள வேலி அல்ல.

எப்போது பெருவெளிக்குள் சர்வதேச மையம் கட்டுமானம் கைவிடப்பட்டதோ அப்போதே அந்தப் பள்ளங்களுக்கே அங்கு வேலை இல்லை. எனவே, அதை மூடி வைத்த தகரத் தகடுகளை சிதைத்தார்கள் என்பது ஒரு தேவையற்ற குற்றச்சாட்டு.

எனவே, நீதிமன்றத்தில் இதுபோன்ற தவறான தகவல் கொடுக்கப்பட்டது இந்து சமய அறநிலையத்துறையின் தவறு.

அக்டோபர் 1 அன்று என்ன நடந்தது?

செப்டம்பர் 10 உத்தரவில் வழக்குகளை 01.10.2026 அன்று மீண்டும் பட்டியலிட குறிப்பிடப்பட்டிருந்தது.

ஆனால் அக்டோபர் 1 அன்று இந்த வழக்குகள் பட்டியலிடப்படவில்லை; விசாரணையும் நடைபெறவில்லை.

இதுவரையிலான நீதிமன்ற நடவடிக்கைகளை எளிமையாகச் சொன்னால் மூன்று முக்கிய கட்டங்களாகப் பிரிக்கலாம்.

30.07.2026: பெருவெளிக்குள் சர்வதேச மையம் கட்டும் முந்தைய திட்டம் கைவிடப்பட்டது. பெருவெளியில் கட்டுமானம் இருக்காது என்று அரசு தெரிவித்தது. நிலத்தைப் பாதுகாக்க வேலி அமைக்கவும் நீதிமன்றம் அறிவுறுத்தியது.

11.08.2026: பெருவெளி பாதிக்கப்படவில்லை என்ற அரசுத் தரப்பின் நிலைப்பாடு நீதிமன்றத்தில் பதிவு செய்யப்பட்டது. விளிம்புப் பகுதியில் மாற்றுத் திட்டம் பரிசீலனையில் இருப்பதும் தெரிவிக்கப்பட்டது.

10.09.2026: கவனம் நிலப் பாதுகாப்பை நோக்கித் திரும்பியது. 106 ஏக்கர் எனக் கூறப்படும் மொத்த நிலப்பரப்பு, தற்போது கட்டுப்பாட்டில் உள்ள சுமார் 74 ஏக்கர், மீதமுள்ள சுமார் 30 ஏக்கர் தொடர்பான உரிமை/ஆக்கிரமிப்பு விவகாரங்களில் சட்டப்படி விசாரணை நடத்த உத்தரவிடப்பட்டது.

பெருவெளிக்குள் சர்வதேச மையம் அமைக்கும் திட்டத்தைக் கைவிட்டது இந்த வழக்கின் மிக முக்கியமான திருப்பம்.

ஆனால் அதனுடன் அனைத்துப் பிரச்சினைகளும் முடிந்துவிடவில்லை.

106 ஏக்கர் என்று கூறப்படும் நிலத்தின் முழுமையான சட்டநிலை என்ன? மீதமுள்ள நிலங்களை மீட்கும் நடவடிக்கை எவ்வாறு நடைபெறுகிறது? சுமார் 74 ஏக்கருக்கான பாதுகாப்பு நடவடிக்கைகள் எந்த நிலையில் உள்ளன?

அதிலும் முக்கியமாக,

“பெருவெளியின் விளிம்பு” என்று இந்து சமய அறநிலையத்துறை குறிப்பிடுவது எது? அந்தப் பகுதியில் என்னென்ன கட்டுமானங்கள் அமைக்கப்பட உள்ளன?

என்பவை அடுத்த கட்டத்தில் விடை காண வேண்டிய முக்கியமான கேள்விகளாக உள்ளன.

பெருவெளியில் சர்வதேச மையம் கட்டும் திட்டம் கைவிடப்பட்டது என்பது ஒரு முடிவு அல்ல; வள்ளலார் பெருவெளியின் நிலம், எல்லை மற்றும் அதன் எதிர்காலப் பாதுகாப்பு குறித்த அடுத்த கட்டத்தின் தொடக்கம் என்றே இதுவரையிலான நீதிமன்ற நடவடிக்கைகள் காட்டுகின்றன.