தமிழ்நாட்டின் கோயில்களில் தமிழுக்கு முதன்மை இடம் அளிக்க வேண்டும்! 2021ஆம் ஆண்டே உயர்நீதிமன்றம் தீர்ப்பு — தவெக அரசு என்ன செய்யப்போகிறது?!

-வளர்மெய்யறிவான் (எ) விசுவா விசுவநாத்

மதுரை மீனாட்சியம்மன் கோயில் குடமுழுக்கில் தமிழ்த் திருமுறைகள், தமிழ் மந்திரங்களுக்கு உரிய இடம் வழங்க வேண்டும் என்ற கோரிக்கை தற்போது வலுப்பெற்றுள்ளது. ஆனால் தமிழ்நாட்டின் கோயில்களில் நடைபெறும் குடமுழுக்கு நிகழ்வுகளில் தமிழுக்கு முதன்மையான இடம் வழங்குவது தொடர்பாக 2021ஆம் ஆண்டிலேயே சென்னை உயர்நீதிமன்ற மதுரைக் கிளை முக்கியமான தீர்ப்பை வழங்கியுள்ளது.

நீதிபதிகள் என். கிருபாகரன், பி. புகழேந்தி ஆகியோர் அடங்கிய அமர்வு வழங்கிய இந்தத் தீர்ப்பு, தற்போது நடைபெறும் தமிழ் வழிபாடு குறித்த விவாதத்தில் மீண்டும் முக்கியத்துவம் பெற்றுள்ளது.

கரூர் கோயில் வழக்கில் வந்த தீர்ப்பு

கரூரில் உள்ள அருள்மிகு கல்யாண பசுபதீஸ்வரர் கோயில் குடமுழுக்கை திருமுறைகள் மற்றும் தமிழ் சைவ மந்திரங்களை ஓதி நடத்த வேண்டும் என்று கோரி டி. பொன்னுசாமி என்பவர் உயர்நீதிமன்ற மதுரைக் கிளையில் வழக்கு தொடர்ந்தார்.

W.P.(MD) No.19115 of 2020 என்ற இந்த வழக்கில் நீதிபதிகள் கிருபாகரன்–புகழேந்தி அமர்வு 2021 ஆகஸ்ட் 19ஆம் தேதி தீர்ப்பளித்தது.

அந்தத் தீர்ப்பில் தமிழ் மொழியின் தொன்மையையும், தமிழின் நீண்ட பக்தி இலக்கிய மரபையும் விரிவாகச் சுட்டிக்காட்டிய நீதிமன்றம், சமஸ்கிருதம் மட்டுமே இறைவனின் மொழி என்று கருத முடியாது என்ற முக்கியமான கருத்தையும் பதிவு செய்தது.

மக்கள் பேசும் ஒவ்வொரு மொழியும் இறைவனின் மொழிதான் என்பதே நீதிமன்றம் முன்வைத்த அடிப்படையான பார்வையாக இருந்தது.

குடமுழுக்கில் தமிழுக்கு முதன்மை

இந்தத் தீர்ப்பின் மிக முக்கியமான பகுதி குடமுழுக்கு தொடர்பான உத்தரவாகும்.

குடமுழுக்கு நிகழ்வுகளில் தமிழ்ப் பாடல்கள் மற்றும் திருமுறைகள் முதன்மையாக ஓதப்பட வேண்டும்; அவற்றுடன் சமஸ்கிருத மந்திரங்கள் மற்றும் வேதங்களையும் ஓதலாம் என்று நீதிமன்றம் வழிகாட்டியது.

எனவே இந்தத் தீர்ப்பு சமஸ்கிருத வழிபாட்டைத் தடை செய்யவில்லை.

மாறாக, தமிழ்நாட்டின் கோயில்களில் தமிழை ஒதுக்கிவிட்டு சமஸ்கிருதத்திற்கு மட்டும் இடம் வழங்கக்கூடாது; தமிழ்த் திருமுறைகளுக்கு முதன்மையான இடம் வழங்க வேண்டும் என்பதையே தெளிவுபடுத்தியது.

தமிழ்ப் பாடல்களைத் தொகுக்கவும் உத்தரவு

நாயன்மார்கள், ஆழ்வார்கள், அருணகிரிநாதர், பட்டினத்தார், சித்தர்கள் உள்ளிட்டோரின் முக்கியமான தமிழ்ப் பக்திப் பாடல்களைக் கண்டறிந்து தொகுப்பதற்கு தமிழ் அறிஞர்கள் உள்ளிட்டோர் அடங்கிய குழுவை அரசு அமைக்க வேண்டும் என்றும் நீதிமன்றம் உத்தரவிட்டது.

அதன்பின்னர் தமிழில் குடமுழுக்கு நடத்துவது அல்லது சமஸ்கிருதத்துடன் தமிழுக்கும் உரிய முக்கியத்துவம் வழங்குவது தொடர்பாக அரசு முடிவெடுக்க வேண்டும் என்றும் தீர்ப்பில் தெரிவிக்கப்பட்டது.

2026-லும் மீண்டும் உறுதிப்படுத்தப்பட்ட தீர்ப்பு

முக்கியமாக, இந்தத் தீர்ப்பு 2021ஆம் ஆண்டுடன் முடிந்துவிடவில்லை.

2026ஆம் ஆண்டு கரூர் மாவட்டம் தாந்தோன்றிமலை கல்யாண வெங்கடரமண சுவாமி கோயில் குடமுழுக்கு தொடர்பான வழக்கிலும் கிருபாகரன்–புகழேந்தி அமர்வின் 2021 தீர்ப்பைப் பின்பற்ற வேண்டும் என்று உயர்நீதிமன்ற மதுரைக் கிளை தெரிவித்தது.

தமிழ் ஓதுவார்களும் யாகசாலைக்குள் அனுமதிக்கப்பட்டு தமிழ்ப் பாடல்கள் மற்றும் செய்யுள்களை ஓத அனுமதிக்கப்படுவார்கள் என்றும் அந்த வழக்கில் அரசு தரப்பில் தெரிவிக்கப்பட்டது.

மீனாட்சியம்மன் கோயில் குடமுழுக்கு — இப்போது கேள்வி என்ன?

மதுரை மீனாட்சியம்மன் கோயில் குடமுழுக்கில் தமிழுக்கு உரிய இடம் வழங்க வேண்டும் என்று தற்போது பல்வேறு தரப்பினரும் வலியுறுத்தி வருகின்றனர்.

இந்தப் பின்னணியில் பார்க்கும்போது, “குடமுழுக்கில் தமிழை அனுமதிக்க முடியுமா?” என்பது இனி முதன்மையான கேள்வியாக இருக்க முடியாது.

ஏனெனில் தமிழ்ப் பாடல்களுக்கும் திருமுறைகளுக்கும் முதன்மையான இடம் வழங்க வேண்டும் என்று உயர்நீதிமன்ற மதுரைக் கிளை 2021ஆம் ஆண்டிலேயே தீர்ப்பளித்திருக்கிறது.

எனவே தற்போது எழுப்பப்பட வேண்டிய கேள்வி இதுதான்:

2021ஆம் ஆண்டிலேயே உயர்நீதிமன்றம் வழங்கிய இந்தத் தீர்ப்பு, கடந்த ஐந்து ஆண்டுகளில் தமிழ்நாட்டின் கோயில்களில் எந்த அளவுக்கு நடைமுறைப்படுத்தப்பட்டது?

மதுரை மீனாட்சியம்மன் கோயில் குடமுழுக்கு நடைபெறவுள்ள நிலையில், அந்தக் கேள்விக்குத் தமிழ்நாடு அரசும் இந்து சமய அறநிலையத்துறையும் அளிக்கப்போகும் பதிலே தற்போது முக்கியத்துவம் பெறுகிறது.