இனியும் கால அவகாசம் தர முடியாது ; நவம்பர் 1, 2026 க்குள் கடைகளின் பெயர்ப் பலகைகளில் தமிழ் கட்டாயம்! தமிழ்நாடு முழுவதும் அமல்படுத்த சென்னை உயர்நீதிமன்றம் உத்தரவு

தமிழ்நாடு முழுவதும் உள்ள கடைகள் மற்றும் வணிக நிறுவனங்களின் பெயர்ப் பலகைகளில் தமிழ் மொழி இடம்பெறுவதை உறுதி செய்ய வேண்டும் என்றும், அதற்கான பெயர்ப் பலகை மாற்றங்களை 2026 நவம்பர் 1ஆம் தேதிக்குள் முடிக்க வேண்டும் என்றும் சென்னை உயர்நீதிமன்றம் உத்தரவிட்டுள்ளது.

நவம்பர் 1ஆம் தேதிக்குள் விதிகளுக்கு ஏற்ப பெயர்ப் பலகைகளை மாற்றாத நிறுவனங்கள் மீது சம்பந்தப்பட்ட அதிகாரிகள் நடவடிக்கை எடுக்கலாம் என்றும் நீதிமன்றம் தெரிவித்துள்ளது.

என்ன வழக்கு?

தமிழ்நாடு தொழிலாளர் மற்றும் திறன் மேம்பாட்டுத் துறை, கடந்த 2025 ஜூன் 11ஆம் தேதி கடைகள் மற்றும் வணிக நிறுவனங்களின் பெயர்ப் பலகைகள் தொடர்பாக உத்தரவு ஒன்றைப் பிறப்பித்திருந்தது.

தமிழ்நாடு முழுவதும் உள்ள கடைகள் மற்றும் வணிக நிறுவனங்களின் பெயர்ப் பலகைகளில் தமிழ் இடம்பெற வேண்டும் என்பதே அந்த உத்தரவின் அடிப்படை.

இந்த உத்தரவை எதிர்த்தும், அதனை நடைமுறைப்படுத்துவதற்குக் கூடுதல் கால அவகாசம் கோரியும் இந்திய சில்லறை வணிகர்கள் சங்கம் - Retailers Association of India சென்னை உயர்நீதிமன்றத்தில் வழக்குத் தொடர்ந்தது.

W.P.No.25715 of 2025 என்ற இந்த வழக்கை நீதிபதி கே. சுரேந்தர் விசாரித்தார்.

ஒரு ஆண்டு அவகாசம் கேட்ட வணிகர்கள்

பெயர்ப் பலகைகளை மாற்றுவதற்கு ஒரு ஆண்டு கால அவகாசம் வழங்க வேண்டும் என்பதும் வணிகர்கள் சங்கத்தின் கோரிக்கையாக இருந்தது.

குறிப்பாக பெரிய வணிக நிறுவனங்கள் ஏற்கெனவே தங்களது வர்த்தக முத்திரை, நிறுவன அடையாளம், எழுத்துரு மற்றும் வடிவமைப்பு உள்ளிட்டவற்றுடன் பெயர்ப் பலகைகளை அமைத்துள்ளதாகவும், அவற்றை உடனடியாக மாற்றுவதில் நடைமுறைச் சிக்கல்கள் இருப்பதாகவும் வணிகர்கள் தரப்பில் முன்பே தெரிவிக்கப்பட்டிருந்தது.

ஆனால் இறுதி விசாரணையின்போது அரசின் உத்தரவைப் பின்பற்றத் தயாராக இருப்பதாக Retailers Association தரப்பு நீதிமன்றத்தில் தெரிவித்தது. அதற்காக மேலும் மூன்று மாதங்கள் அவகாசம் வழங்குமாறும் கோரியது.

“ஏற்கெனவே ஓராண்டு கடந்துவிட்டது”

இதனைப் பதிவு செய்த நீதிபதி கே. சுரேந்தர், அரசின் உத்தரவு பிறப்பிக்கப்பட்டு ஏற்கெனவே ஓராண்டுக்கு மேல் கடந்துவிட்டதைச் சுட்டிக்காட்டினார்.

எனவே கடைகளின் பெயர்ப் பலகைகளை மாற்றுவதற்கான இறுதி வாய்ப்பாக 2026 நவம்பர் 1ஆம் தேதி வரை கால அவகாசம் வழங்கினார்.

அதற்குள் பெயர்ப் பலகைகளை மாற்றி முடிக்க வேண்டும் என்றும், நீதிமன்ற உத்தரவுக்கு இணங்கத் தவறினால் சம்பந்தப்பட்ட அதிகாரிகள் நடவடிக்கை எடுக்கலாம் என்றும் நீதிபதி உத்தரவிட்டார்.

இதனுடன் வழக்கும் முடித்து வைக்கப்பட்டது.

தமிழ் மட்டும்தான் இருக்க வேண்டுமா?

இந்த உத்தரவு குறித்து வெளியாகும் செய்திகளில் கவனிக்க வேண்டிய முக்கியமான செய்தி இதுதான்.

கடைகளின் பெயர்ப் பலகைகளில் தமிழ் மட்டுமே இருக்க வேண்டும் என்று உயர்நீதிமன்றம் கூறவில்லை.

நீதிமன்றத் தீர்ப்பிலேயே, ஒவ்வொரு சில்லறை விற்பனை நிலையம் மற்றும் வணிக நிறுவனத்தின் பெயர்ப் பலகையிலும் தமிழுடன் பிற மொழிகளும் இடம்பெறலாம் என்ற அரசின் தேவையைப் பதிவு செய்துள்ளது.

எனவே ஆங்கிலம் அல்லது பிற மொழிகளில் பெயர் வைப்பதற்கு முழுமையான தடை விதிக்கப்பட்டுள்ளது என்று இந்தத் தீர்ப்புக்குப் பொருள் கொள்ள முடியாது.

தமிழ் இடம்பெற வேண்டும்; தமிழுக்கு உரிய முதன்மை அளிக்கப்பட வேண்டும் என்பதே நடைமுறையின் அடிப்படை.

2025ஆம் ஆண்டிலேயே Retailers Association வெளியிட்ட தகவலிலும், பெயர்ப் பலகைகளில் தமிழுடன் பிற மொழிகளையும் பயன்படுத்தலாம்; தமிழுக்கு உரிய முக்கியத்துவம் வழங்கப்பட வேண்டும் என்று அரசின் அறிவுறுத்தல் இருப்பதாகத் தெரிவிக்கப்பட்டிருந்தது.

தமிழுக்கு முதன்மை என்பது புதிய விதியா?

அதுவும் இல்லை.

தமிழ்நாட்டில் கடைகள் மற்றும் வணிக நிறுவனங்களின் பெயர்ப் பலகைகளில் தமிழுக்கு முதன்மை வழங்குவது தொடர்பான விதிமுறை ஏற்கெனவே நடைமுறையில் உள்ளது.

Tamil Nadu Shops and Establishments Rules, 1948 விதிமுறைகளின் அடிப்படையிலேயே பெயர்ப் பலகைகளில் தமிழ் இடம்பெற வேண்டும் என்ற அரசின் நடவடிக்கை மேற்கொள்ளப்பட்டுள்ளது.

இந்த விதிகளை நடைமுறைப்படுத்துவதற்காகத்தான் தொழிலாளர் துறை 2025 ஜூன் மாதம் மாநிலம் முழுவதும் பெயர்ப் பலகைகளை மாற்ற அறிவுறுத்தியிருந்தது என்பதும் உயர்நீதிமன்றத் தீர்ப்பில் பதிவாகியுள்ளது.

முன்னதாக ரூ.2,000 அபராத எச்சரிக்கை

2025ஆம் ஆண்டு சென்னை மாநகராட்சியிடமிருந்து கிடைத்த அறிவுறுத்தல் தொடர்பாக வணிகர்கள் உயர்நீதிமன்றத்தை அணுகியபோது, பெயர்ப் பலகையில் முதலில் தமிழ், அதற்குக் கீழ் ஆங்கிலம், தேவைப்பட்டால் அதற்குக் கீழ் மூன்றாவது மொழி இடம்பெற வேண்டும் என்றும், விதிகளைப் பின்பற்றாவிட்டால் ரூ.2,000 அபராதம் விதிக்கப்படும் என்றும் தங்களுக்குத் தெரிவிக்கப்பட்டதாக Retailers Association நீதிமன்றத்தில் கூறியிருந்தது. 

அந்தக் கட்டத்தில் வணிகர்களின் கோரிக்கையைப் பரிசீலிக்குமாறு சென்னை மாநகராட்சிக்கு நீதிமன்றம் உத்தரவிட்டிருந்தது.

தற்போதைய வழக்கில், தமிழக அரசின் 2025 ஜூன் 11ஆம் தேதி உத்தரவை எதிர்த்து தொடரப்பட்ட மனுவை முடித்து வைத்த நீதிமன்றம், 2026 நவம்பர் 1ஆம் தேதியை இறுதிக் காலக்கெடுவாக நிர்ணயித்துள்ளது.

வணிகர்கள் கவனத்திற்கு..

எனவே தமிழ்நாடு முழுவதும் கடைகள், சில்லறை விற்பனை நிலையங்கள் மற்றும் விதிகளுக்குட்பட்ட வணிக நிறுவனங்களை நடத்துவோர் தங்களது தற்போதைய பெயர்ப் பலகைகள் விதிகளுக்கு ஏற்ப உள்ளனவா என்பதைச் சரிபார்த்துக் கொள்வது அவசியமாகியுள்ளது.

தமிழ் இடம்பெறாத பெயர்ப் பலகைகளை வைத்திருப்பவர்கள், நீதிமன்றம் வழங்கியுள்ள இறுதி காலக்கெடுவான 2026 நவம்பர் 1ஆம் தேதிக்குள் அவற்றை விதிகளுக்கு ஏற்ப மாற்றிக் கொள்வது அவசியம்.

அதன்பிறகும் விதிகளைப் பின்பற்றாவிட்டால் சம்பந்தப்பட்ட அதிகாரிகள் நடவடிக்கை மேற்கொள்ளலாம் என்பதையும் சென்னை உயர்நீதிமன்றம் தெளிவுபடுத்தியுள்ளது.