நக்கீரன் கோபால் மீது ஓய்வூதிய மோசடிப் புகார்! சட்ட நடவடிக்கை கோரும் சென்னை பிரஸ் கிளப்!

நக்கீரன் கோபால் மீது பத்திரிகையாளர் ஓய்வூதிய மோசடிப் புகார்!

பத்திரிகையாளர்கள் அல்லாதவர்களை ஆசிரியர் குழுவில் சேர்த்து அரசின் ஓய்வூதியம் பெற்றதாகக் குற்றச்சாட்டு!

நக்கீரன் கோபால் மீது சட்ட நடவடிக்கை எடுக்க வேண்டும்! இருவரின் ஓய்வூதியத்தை ரத்து செய்ய வேண்டும்!

தமிழ்நாடு முதலமைச்சருக்கு சென்னை பிரஸ் கிளப் பொதுச் செயலாளர் ச. விமலேஷ்வரன் மனு!

சென்னை | 17.10.2026

நக்கீரன் வாரமிருமுறை இதழின் ஆசிரியர் ஆர்.ஆர். கோபால் என்கிற நக்கீரன் கோபால், பத்திரிகையாளர்கள் அல்லாத ஊழியர்களை ஆசிரியர் குழுவில் சேர்த்து, தமிழ்நாடு அரசின் பத்திரிகையாளர் ஓய்வூதியத் திட்டத்தில் முறைகேடாகப் பயனடையச் செய்துள்ளதாகக் குற்றஞ்சாட்டி, சென்னை பிரஸ் கிளப் பொதுச் செயலாளர் ச. விமலேஷ்வரன் தமிழ்நாடு முதலமைச்சருக்குப் புகார் மனு அனுப்பியுள்ளார்.

2026 அக்டோபர் 17ஆம் தேதி அனுப்பப்பட்டுள்ள அந்தப் புகார் மனுவில், நக்கீரன் நிறுவனத்தில் கணக்கு, சந்தா, நிர்வாகம், காசாளர் மற்றும் விளம்பரப் பிரிவுகளில் பணியாற்றியவர்களின் பெயர்கள் பின்னர் ஆசிரியர் குழுவில் சேர்க்கப்பட்டுள்ளதாகக் குற்றஞ்சாட்டப்பட்டுள்ளது.

மேலும், தமிழ்நாடு அரசின் பத்திரிகையாளர் ஓய்வூதியத் திட்டத்தில் தேர்வு செய்யப்பட்டுள்ள இருவரின் தகுதியை மறுபரிசீலனை செய்து, அவர்களின் பெயர்களைப் பயனாளிகள் பட்டியலிலிருந்து நீக்க வேண்டும் என்றும் கோரப்பட்டுள்ளது.

பத்திரிகையாளர் ஓய்வூதியத் திட்டம்

தமிழ்நாடு அரசு, தமிழ் வளர்ச்சி மற்றும் செய்தி மக்கள் தொடர்புத் துறை மூலம் பத்திரிகையாளர்களுக்கான பல்வேறு நலத்திட்டங்களைச் செயல்படுத்தி வருகிறது.

அந்த வகையில், 60 வயது நிறைவடைந்த செய்தியாளர்கள், பிழை திருத்துவோர், புகைப்படக் கலைஞர்கள், உதவி ஆசிரியர்கள் மற்றும் ஆசிரியர்களுக்கு கருணை அடிப்படையில் மாதம் ரூ.15,000 ஓய்வூதியம் வழங்கப்படுவதாக மனுவில் தெரிவிக்கப்பட்டுள்ளது.

குறைந்த ஊதியத்தில் பணியாற்றி, தற்போது பொருளாதார ரீதியாக நலிவுற்ற நிலையில் உள்ள பத்திரிகையாளர்களுக்காக இந்தத் திட்டம் செயல்படுத்தப்படுவதாகவும், பத்திரிகை நிறுவனங்களின் விற்பனை, விளம்பரம், அச்சகம் உள்ளிட்ட பிற பிரிவுகளில் பணியாற்றும் ஊழியர்களுக்கு இந்த ஓய்வூதியம் வழங்கப்படுவதில்லை என்றும் மனுவில் குறிப்பிடப்பட்டுள்ளது.

நக்கீரன் நிறுவனத்தின் மூன்று ஊழியர்கள் குறித்து குற்றச்சாட்டு!

நக்கீரன் நிறுவனத்தில் சுமார் 30 ஆண்டுகளாகப் பணியாற்றிய மூன்று ஊழியர்களின் பதவிகள் தொடர்பாகப் புகார் மனுவில் குறிப்பிட்ட குற்றச்சாட்டுகள் முன்வைக்கப்பட்டுள்ளன.

அதன்படி,

எம். சந்திரமோகன் – கணக்கு மற்றும் சந்தா மேலாளர்.

சி. பிரான்சிஸ் – நிர்வாக மேலாளர்.

பி.என். ஆனந்த் – முதன்மைக் காசாளர்.

இந்த மூவரும் 2026ஆம் ஆண்டில் ஓய்வுபெறும் நிலையில் இருப்பதாகவும், பத்திரிகையாளர்களுக்கான ஓய்வூதியம் பெறுவதற்குத் தகுதியற்றவர்கள் என்றும் மனுதாரர் கூறியுள்ளார்.

முன்னாள் முதலமைச்சர் மு.க. ஸ்டாலினுக்கும் நக்கீரன் கோபாலுக்கும் இருந்த நெருக்கத்தையும், தனது செல்வாக்கையும் பயன்படுத்தி, இந்த மூவருக்கும் ஓய்வூதியம் பெற்றுத்தர நக்கீரன் கோபால் முயன்றதாக மனுவில் குற்றஞ்சாட்டப்பட்டுள்ளது.

இதுகுறித்து முந்தைய அரசின் கவனத்திற்கும் கொண்டு சென்றதாகச் ச. விமலேஷ்வரன் தெரிவித்துள்ளார்.

ஆசிரியர் குழுவில் பெயர்கள் மாற்றப்பட்டனவா?

2023ஆம் ஆண்டு வரை கணக்கு மற்றும் சந்தா மேலாளராக இருந்த சந்திரமோகன், 2024ஆம் ஆண்டு முதல் உதவி ஆசிரியராகக் குறிப்பிடப்பட்டுள்ளதாகப் புகார் மனுவில் தெரிவிக்கப்பட்டுள்ளது.

அதேபோன்று, 2025ஆம் ஆண்டு வரை நிர்வாக மேலாளராக இருந்த சி. பிரான்சிஸ், முதன்மைக் காசாளராக இருந்த பி.என். ஆனந்த் ஆகியோரின் பெயர்கள் 2026ஆம் ஆண்டு முதல் நக்கீரன் இதழின் ஆசிரியர் குழுவில் துணை ஆசிரியர்களாகச் சேர்க்கப்பட்டுள்ளதாகக் குற்றஞ்சாட்டப்பட்டுள்ளது.

மேலும், நிர்வாக மேலாளர் பொறுப்பில் 'பிரின்ஸ்' என்றும், முதன்மைக் காசாளர் பொறுப்பில் 'நித்தியானந்தன்' என்றும் பெயர்கள் அச்சிடப்பட்டுள்ளதாகவும், இவை முறையே சி. பிரான்சிஸ் மற்றும் பி.என். ஆனந்த் ஆகியோரைக் குறிக்கும் பெயர்களே என்றும் மனுதாரர் கூறியுள்ளார்.

2024ஆம் ஆண்டு வரை விளம்பரப் பிரிவில் பிரதிநிதியாக இருந்த சுப்பு என்பவரின் பெயர், 2026ஆம் ஆண்டு முதல் முதன்மை நிருபர்கள் பட்டியலில் சேர்க்கப்பட்டுள்ளதாகவும் புகார் மனுவில் தெரிவிக்கப்பட்டுள்ளது.

பழைய நக்கீரன் இதழ்களை ஆதாரமாகக் குறிப்பிடும் புகார்!

இந்தக் குற்றச்சாட்டுகளுக்கு ஆதாரமாகப் பல்வேறு காலகட்டங்களில் வெளியான நக்கீரன் இதழ்களின் 'Imprint' எனப்படும் ஆசிரியர் மற்றும் நிர்வாகப் பொறுப்பாளர் விவரங்கள் அச்சிடப்படும் பக்கங்களை மனுதாரர் குறிப்பிட்டுள்ளார்.

2010 டிசம்பர் 29–31, 2016 நவம்பர் 23–25 மற்றும் 2022 நவம்பர் 9–11 ஆகிய தேதிகளில் வெளியான இதழ்களில் சி. பிரான்சிஸ் நிர்வாக மேலாளராகவும், எம். சந்திரமோகன் கணக்கு மற்றும் சந்தா மேலாளராகவும், பி.என். ஆனந்த் காசாளராகவும், சுப்பு விளம்பரப் பிரதிநிதியாகவும் குறிப்பிடப்பட்டுள்ளதாக மனுவில் தெரிவிக்கப்பட்டுள்ளது.

2024 பிப்ரவரி 7–9 தேதியிட்ட இதழில் நிர்வாக மேலாளர் சி. பிரான்சிஸ், கணக்கு மற்றும் சந்தா மேலாளர் சி. மோகன், முதன்மைக் காசாளர் பி.என். ஆனந்த், விளம்பரப் பிரதிநிதி சுப்பு எனப் பெயர்கள் இடம்பெற்றுள்ளதாகவும் கூறப்பட்டுள்ளது.

அதே இதழில் சந்திரமோகன் உதவி ஆசிரியராகக் குறிப்பிடப்பட்டதாகவும், கணக்கு மற்றும் சந்தா மேலாளர் என்ற இடத்தில் இடம்பெற்ற சி. மோகன் என்பதும் சந்திரமோகனையே குறிக்கிறது என்றும் மனுதாரர் குற்றஞ்சாட்டியுள்ளார்.

2026 ஜனவரி 31–பிப்ரவரி 3 தேதியிட்ட நக்கீரன் இதழில் சி. பிரான்சிஸ், பி.என். ஆனந்த் ஆகியோர் துணை ஆசிரியர்கள் பட்டியலில் சேர்க்கப்பட்டுள்ளதாகவும், சுப்பு முதன்மை நிருபர்கள் பட்டியலில் இடம்பெற்றுள்ளதாகவும் மனுவில் சுட்டிக்காட்டப்பட்டுள்ளது.

இந்தப் பதவி மற்றும் பெயர் மாற்றங்கள் பத்திரிகையாளர் ஓய்வூதியத் திட்டத்தில் பயனடைவதற்காகத் திட்டமிட்டு மேற்கொள்ளப்பட்டவை என்பதே புகாரின் முக்கியக் குற்றச்சாட்டாகும்.

பணிக்கொடை வழங்குவதற்குப் பதிலாக அரசு ஓய்வூதியமா?

நக்கீரன் நிறுவனத்தில் 30 ஆண்டுகளுக்கும் மேலாகப் பணியாற்றிய ஊழியர்களுக்கு உரிய பணிக்கொடை, தொழிலாளர் சேமநல நிதி உள்ளிட்ட சட்டப்படியான பணப்பலன்களை நிறுவனம் வழங்க வேண்டும் என்று மனுவில் குறிப்பிடப்பட்டுள்ளது.

ஆனால், நிறுவனத்தின் சார்பில் வழங்க வேண்டிய பணப்பலன்களுக்குப் பதிலாக, அரசின் பத்திரிகையாளர் ஓய்வூதியத்தைப் பெற்றுத்தருவதாக ஓய்வுபெறும் நிலையிலுள்ள ஊழியர்களிடம் நக்கீரன் கோபால் தெரிவித்ததாகச் ச. விமலேஷ்வரன் குற்றஞ்சாட்டியுள்ளார்.

அந்த நோக்கத்திற்காகவே நிர்வாகம் மற்றும் கணக்குப் பிரிவுகளில் பணியாற்றிய ஊழியர்களின் பெயர்கள் அவர்களது சம்மதத்துடன் ஆசிரியர் குழுவில் சேர்க்கப்பட்டதாகவும் மனுவில் கூறப்பட்டுள்ளது.

அரசாணை எண் 181 – இரண்டு பேரின் தகுதி குறித்து கேள்வி!

தமிழ்நாடு அரசின் தமிழ் வளர்ச்சி மற்றும் செய்தித்துறை சார்பில் 2026 அக்டோபர் 5ஆம் தேதி வெளியிடப்பட்ட அரசாணை (நிலை) எண் 181 மூலம் பத்திரிகையாளர் ஓய்வூதியத் திட்டத்திற்கு 23 பேர் தேர்வு செய்யப்பட்டுள்ளதாக மனுவில் தெரிவிக்கப்பட்டுள்ளது.

அந்தப் பட்டியலில் இடம்பெற்றுள்ள இரண்டு பேரின் தகுதி குறித்து மனுதாரர் குறிப்பாகக் கேள்வி எழுப்பியுள்ளார்.

1. ச. ரவி – வரிசை எண் 3

பிழை திருத்துபவர் என்ற அடிப்படையில் ஓய்வூதியத் திட்டத்திற்குத் தேர்வு செய்யப்பட்டுள்ள ச. ரவி, உண்மையில் நக்கீரன் அலுவலகத்தில் காவலாளியாகப் பணியாற்றியவர் என்று மனுவில் குற்றஞ்சாட்டப்பட்டுள்ளது.

கடந்த 25 ஆண்டுகளாக வெளியான நக்கீரன் இதழ்களின் Imprint பகுதியில் அவரது பெயர் பிழை திருத்துவோர் பட்டியலில் இடம்பெறவில்லை என்றும் மனுதாரர் தெரிவித்துள்ளார்.

2. ம. சந்திரமோகன் – வரிசை எண் 17

துணை ஆசிரியராகப் பணியாற்றியதாகக் குறிப்பிடப்பட்டுள்ள ம. சந்திரமோகன், கடந்த 30 ஆண்டுகளாக நக்கீரன் நிறுவனத்தின் நிர்வாகப் பிரிவில் சந்தா மேலாளராகப் பணியாற்றியவர் என்று புகார் மனுவில் கூறப்பட்டுள்ளது.

2024ஆம் ஆண்டு வரை வெளியான நக்கீரன் இதழ்களின் Imprint பகுதியில் அவரது நிர்வாகப் பொறுப்பு தெளிவாகக் குறிப்பிடப்பட்டிருந்ததாகவும், பின்னர் ஆசிரியர் குழுவில் அவரது பெயர் சேர்க்கப்பட்டதாகவும் மனுதாரர் தெரிவித்துள்ளார்.

இவ்வாறு பதவியை மாற்றிக் காட்டியதன் அடிப்படையில் சந்திரமோகனுக்குப் பத்திரிகையாளர் ஓய்வூதியம் பெற்றுத்தரப்பட்டுள்ளதாக மனுவில் குற்றஞ்சாட்டப்பட்டுள்ளது.

நக்கீரன் கோபால் மீது சட்ட நடவடிக்கை கோரிக்கை!

பத்திரிகையாளர்களுக்காக உருவாக்கப்பட்ட அரசின் நலத்திட்டத்தைத் தகுதியற்றவர்கள் பெறும் வகையில் தவறாகப் பயன்படுத்தியுள்ளதாக நக்கீரன் கோபால் மீது சென்னை பிரஸ் கிளப் பொதுச் செயலாளர் ச. விமலேஷ்வரன் குற்றஞ்சாட்டியுள்ளார்.

இது தொடர்பாக உரிய விசாரணை நடத்தி, சட்டப்படியான குற்றவியல் நடவடிக்கை மேற்கொள்ள வேண்டும் என்று முதலமைச்சரிடம் கோரிக்கை விடுத்துள்ளார்.

மேலும், 2026ஆம் ஆண்டுக்கான தமிழ்நாடு அரசின் பத்திரிகையாளர் ஓய்வூதியப் பயனாளிகள் பட்டியலில் இடம்பெற்றுள்ள ச. ரவி மற்றும் ம. சந்திரமோகன் ஆகிய இருவரின் பெயர்களையும் நீக்கி, மறு உத்தரவு பிறப்பிக்க வேண்டும் என்றும் வலியுறுத்தியுள்ளார்.

முதலமைச்சருக்கு மனு – உயர் அதிகாரிகளுக்கும் நகல்!

2026 அக்டோபர் 17ஆம் தேதி தேதியிட்ட இந்தப் புகார் மனு, தமிழ்நாடு முதலமைச்சருக்கு அனுப்பப்பட்டுள்ளது.

அதன் நகல்கள் தமிழ் வளர்ச்சி மற்றும் செய்தித்துறை அமைச்சர், தமிழ்நாடு அரசின் தலைமைச் செயலாளர், தமிழ் வளர்ச்சி மற்றும் செய்தித்துறை இயக்குநர், சென்னை மாநகரக் காவல் ஆணையாளர் ஆகியோருக்கும் அனுப்பப்பட்டுள்ளதாக மனுவில் குறிப்பிடப்பட்டுள்ளது.