மதுரை மீனாட்சியம்மன் கோயில் குடமுழுக்கு: தமிழில் திருமுறைகள் ஓத உயர்நீதிமன்றம் உத்தரவு; தீர்ப்பை நிறைவேற்றக் கோரி தெய்வத் தமிழ்ப் பேரவை மனு!

மதுரை அருள்மிகு மீனாட்சியம்மன் சொக்கநாதர் திருக்கோயிலில் நடைபெறவுள்ள குடமுழுக்கு பெருவிழாவில் தமிழில் திருமுறைகள் மற்றும் தமிழ் வேத மந்திரங்களை ஓத அனுமதிக்க வேண்டும் என உயர்நீதிமன்றம் அளித்துள்ள தீர்ப்பை நிறைவேற்றக் கோரி, தெய்வத் தமிழ்ப் பேரவை சார்பில் இந்து சமய அறநிலையத்துறை இணை ஆணையர் அலுவலகத்தில் இன்று (02.09.2026) கோரிக்கை மனு அளிக்கப்பட்டது

சங்கம் வைத்து தமிழ் வளர்த்த மதுரையில் அமைந்துள்ள அருள்மிகு மீனாட்சியம்மன் சொக்கநாதர் திருக்கோயிலின் குடமுழுக்கு பெருவிழா வரும் **செப்டம்பர் 17 ஆம் தேதி** நடைபெற உள்ளது.

தமிழில் திருமுறைகள் ஓதக் கோரி வழக்கு

இந்த நிலையில், தமிழ்வேத ஆகமப் பாடசாலை நிறுவனரும், தெய்வத் தமிழ்ப் பேரவை செயற்குழு உறுப்பினருமான சிம்மம் சத்தியபாமா மீனாட்சியம்மன் கோயில் குடமுழுக்கு பெருவிழாவில் தமிழில் திருமுறைகள் மற்றும் தமிழ் வேத மந்திரங்களை ஓத அனுமதிக்கக் கோரி சென்னை உயர்நீதிமன்றத்தில் வழக்கு தொடர்ந்திருந்தார்.

குறிப்பாக, குடமுழுக்கு விழாவின்போது நடைபெறும் **கோபுரக் கலச நன்னீராட்டு, கருவறை பூசை மற்றும் வேள்விச்சாலை நிகழ்வுகள்** ஆகிய மூன்றிலும் தமிழில் திருமுறைகள் மற்றும் தமிழ் வேத மந்திரங்களை ஓத தன்னை அனுமதிக்க வேண்டும் என்று அவர் கோரியிருந்தார்.

அத்துடன், தமிழ்நாட்டில் ஆண்டு முழுவதும் பல்வேறு கோயில்களில் நடைபெறும் குடமுழுக்கு விழாக்களிலும் தமிழில் திருமுறைகள் மற்றும் தமிழ் வேத மந்திரங்களை ஓத தன்னை அனுமதிக்க வேண்டும் என்றும் மனுவில் கோரிக்கை வைக்கப்பட்டிருந்தது.

உயர்நீதிமன்றத் தீர்ப்பு

இந்த வழக்கில் உயர்நீதிமன்ற நீதிபதி கிருஷ்ணன் இராமசாமி கடந்த 24.08.2026 அன்று தீர்ப்பளித்தார்.

மீனாட்சியம்மன் கோயில் குடமுழுக்கு பெருவிழாவில் **கோபுரக் கலசம், கருவறை பூசை மற்றும் வேள்விச்சாலை** ஆகிய மூன்று இடங்களிலும் சமஸ்கிருத வேத மந்திரங்கள் ஓதப்படும்போது, தமிழ் திருமுறை ஓதுவார்கள் பக்கத்தில் நின்று தமிழ் மந்திரங்களை ஓத அனுமதிக்க வேண்டும் என்று தீர்ப்பில் குறிப்பிடப்பட்டுள்ளதாக தெய்வத் தமிழ்ப் பேரவை தெரிவித்துள்ளது.

தீர்ப்பை நிறைவேற்றக் கோரி மனு

இந்தத் தீர்ப்பை எதிர்வரும் மீனாட்சியம்மன் கோயில் குடமுழுக்கு விழாவில் முழுமையாக நடைமுறைப்படுத்த வேண்டும் என வலியுறுத்தி, தெய்வத் தமிழ்ப் பேரவையினர் இன்று காலை 11 மணியளவில் மீனாட்சியம்மன் கோயில் இந்து சமய அறநிலையத்துறை இணை ஆணையர் அலுவலகத்திற்குச் சென்று கோரிக்கை மனு அளித்தனர்.

தெய்வத் தமிழ்ப் பேரவை செயற்குழு உறுப்பினரும் தமிழ் வேத ஆகமப் பாடசாலை நிறுவனருமான சிம்மம் சத்தியபாமா வடகுரு மடாதிபதியும் இராசயோக சித்தர் பீடத்தைச் சேர்ந்தவருமான குச்சனூர் கிழார் தெய்வத் தமிழ்ப் பேரவையின் மதுரை மாவட்ட அமைப்பாளர் கதிர் நிலவன் ஆகியோர் தலைமையில் மனு அளிக்கப்பட்டது.

இணை ஆணையர் அலுவலகத்தில் இல்லாததால், அலுவலக மேற்பார்வையாளர்  சரவணன் கோரிக்கை மனுவைப் பெற்றுக்கொண்டார்.

பலர் பங்கேற்பு

இந்த நிகழ்வில் மலையரசன், சுதர்சன், கரிகாலன், திருப்பரங்குன்றம் ஆறுமுகம், முருகன், புருசோத்தமன், ஆன்மீகர்கள் தமிழ் மணி, வெற்றிச் செல்வி உள்ளிட்ட பலர் கலந்து கொண்டனர்.

செப்டம்பர் 17 ஆம் தேதி நடைபெறவுள்ள மீனாட்சியம்மன் கோயில் குடமுழுக்கு விழாவுக்கு இன்னும் சில நாட்களே உள்ள நிலையில், தமிழில் திருமுறைகள் மற்றும் தமிழ் வேத மந்திரங்களை ஓத அனுமதிக்க வேண்டும் என்ற உயர்நீதிமன்றத் தீர்ப்பு எவ்வாறு நடைமுறைப்படுத்தப்படும் என்பது தற்போது முக்கியத்துவம் பெற்றுள்ளது.