தாராபுரம் இடைத்தேர்தல் 2026: தவெகவுக்குச் சாதனையா? சோதனையா? – தமிழ் ஊடகம் கள ஆய்வு

தாராபுரம் சட்டமன்றத் தொகுதி: தவெகவுக்குச் சாதனையா? சோதனையா?!

குடிநீர், பாசனம், மின்தடை, வேட்பாளர் மீதான அதிருப்தி – முதலமைச்சர் விஜயிடம் தொகுதி மக்கள் எதிர்பார்ப்பது என்ன?

– தமிழ் ஊடகம் சிறப்புச் செய்தியாளர் குழுவினரின் கள ஆய்வு

தாராபுரம் சட்டமன்றத் தொகுதியில் இடைத்தேர்தல் களம் சூடுபிடித்துள்ள நிலையில், அரசியல் கட்சிகளின் வெற்றி, தோல்விக் கணக்குகளைக் கடந்து, தொகுதி மக்களின் அடிப்படை வாழ்வாதாரப் பிரச்சினைகள் மீண்டும் பேசுபொருளாகியுள்ளன.

குறிப்பாகக் குடிநீர், விவசாயப் பாசனம், வறட்சி, நிலத்தடி நீர்மட்டம், மின்தடை ஆகிய பிரச்சினைகளுக்கு நிரந்தரத் தீர்வு வேண்டும் என்ற எதிர்பார்ப்பு களத்தில் முன்வைக்கப்படுகிறது.

செப்டம்பர் 30 அன்று தாராபுரத்திற்கு வருகை தரும் முதலமைச்சர் விஜய், இக்கோரிக்கைகளுக்கு என்ன பதிலளிக்கப் போகிறார் என்ற கேள்வியும் எழுந்துள்ளது.

மூன்று ஒன்றியங்கள்; பன்முகத்தன்மை கொண்ட தொகுதி!

தாராபுரம், குண்டடம், மூலனூர் ஆகிய மூன்று ஒன்றியங்களை உள்ளடக்கியது தாராபுரம் சட்டமன்றத் தொகுதி.

தொகுதியின் வாக்காளர் விவரம்:

ஆண்கள் 1,06,875

பெண்கள் 1,15,523

மூன்றாம் பாலினத்தவர் 8

மொத்தம் 2,22,406

கொங்குவேளாளக் கவுண்டர்கள், அருந்ததியர், தேவேந்திரகுல வேளாளர், பறையர், வன்னியர், தெலுங்கு செட்டியார்கள், முதலியார்கள், நாடார்கள் உள்ளிட்ட பல்வேறு சமூகங்களைச் சேர்ந்த மக்களும், இஸ்லாமியர், கிறித்தவர் உள்ளிட்ட பல்வேறு மதங்களைச் சேர்ந்த மக்களும் இத்தொகுதியில் வாழ்கின்றனர்.

சமூக, மதப் பன்முகத்தன்மை கொண்ட தாராபுரம், பட்டியலின மக்களுக்காக ஒதுக்கப்பட்ட சட்டமன்றத் தனித்தொகுதியாகும்.

வேளாண் நிலங்கள் அதிகம்; பாசன நீர் போதவில்லை!

தாராபுரம் தொகுதியின் பொருளாதாரத்தில் வேளாண்மையும் வேளாண்மை சார்ந்த தொழில்களும் முக்கியப் பங்கு வகிக்கின்றன. ஆனால், போதுமான பாசன நீர் கிடைக்காததால் பல பகுதிகளில் விளைநிலங்கள் தரிசாகக் கிடப்பதாக விவசாயிகள் தெரிவிக்கின்றனர்.

தாராபுரம் பகுதியில் அமராவதி ஆறும் சண்முக நதியும் சீதக்காடு அருகே ஒன்றிணைந்து தொடர்ந்து பாய்கின்றன. இந்த நீராதாரங்களால் தாராபுரத்தின் தெற்குப் பகுதிகளும் வடகிழக்கின் சில பகுதிகளும் பயனடைகின்றன.

அதேவேளையில், குண்டடம் ஒன்றியம், தாராபுரத்தின் வடக்கு, வடமேற்கு மற்றும் மேற்குப் பகுதிகளில் நீர்ப்பாசன வசதிகள் போதுமான அளவில் இல்லை என்பதே அப்பகுதி விவசாயிகளின் நீண்டகாலக் குறையாக உள்ளது.

தொகுதியின் ஒரு பகுதி பசுமையாகக் காட்சியளிக்க, மற்றொரு பெரும்பகுதி வறட்சியால் பாதிக்கப்பட்டுள்ளது. சுமார் 40 விழுக்காடு பகுதிகள் ஓரளவு பசுமையாகவும், 60 விழுக்காடு பகுதிகள் வறட்சியுடனும் காணப்படுவதாகக் களத்தில் முன்வைக்கப்படும் மதிப்பீடு, இப்பகுதிகளுக்கு இடையிலான நீராதார வேறுபாட்டை உணர்த்துகிறது.

உப்பாறு அணைக்கு நீர் எப்போது?

தாராபுரம் தொகுதியின் முக்கிய நீர்ப்பாசனக் கோரிக்கைகளில் ஒன்று உப்பாறு அணைக்கான நீர்வரத்து.

பரம்பிக்குளம்–ஆழியாறு பாசனத் திட்டம் (PAP) வழியாக உப்பாறு அணைக்கு நீர் கிடைத்துவந்ததாகக் கூறும் விவசாயிகள், கடந்த பல ஆண்டுகளாக அந்த நீர்வரத்து முறையாக இல்லை என்று தெரிவிக்கின்றனர்.

சுமார் 40 ஆண்டுகளாக அணைக்குப் போதுமான நீர்வரத்து இல்லை என்பதும் விவசாயிகள் தரப்பில் முன்வைக்கப்படும் குற்றச்சாட்டாகும்.

உப்பாறு அணைக்குத் திட்டமிட்ட முறையில் நீர் வழங்கப்பட்டால், அதனைச் சார்ந்த விவசாய நிலங்களுக்கும் நிலத்தடி நீராதாரங்களுக்கும் பயன் கிடைக்கும் என்பது அப்பகுதி மக்களின் எதிர்பார்ப்பு.

நல்லதங்காள் அணைக்கட்டுக்கும் நீர் வேண்டும்!

உப்பாறு அணையைப் போலவே நல்லதங்காள் அணைக்கட்டுக்கும் முறையான நீர்வரத்து ஏற்படுத்த வேண்டும் என்ற கோரிக்கை எழுந்துள்ளது.

இந்த இரண்டு நீர்த்தேக்கங்களிலும் போதுமான நீரைச் சேமிக்க வழிவகை செய்தால், தொகுதியின் வறட்சிப் பகுதிகளில் ஓரளவுக்காவது பாசனப் பற்றாக்குறையைச் சமாளிக்க முடியும் என்று விவசாயிகள் கருதுகின்றனர்.

அமராவதி–சண்முக நதிப் பகுதிகளில் மழைக்காலங்களில் ஏற்படும் கூடுதல் நீர்வரத்தை உரிய ஆய்வுகளின் அடிப்படையில் நீர்த்தேக்கங்களுக்குத் திருப்பிச் சேமிப்பதற்கான வாய்ப்புகளையும் அரசு ஆராய வேண்டும் எனக் கோரிக்கை வைக்கப்படுகிறது.

ஆனைமலையாறு–நல்லாறு திட்டம் என்னவாகும்?

தாராபுரம் தொகுதியின் பல பகுதிகளில் “ஆனைமலையாறு–நல்லாறு திட்டத்தை நிறைவேற்ற வேண்டும்” என்ற கோரிக்கைப் பதாகைகள் வைக்கப்பட்டுள்ளன.

பரம்பிக்குளம்–ஆழியாறு திட்டத்துடன் தொடர்புடைய நீண்டகால நீர்ப்பாசனக் கோரிக்கைகளில் இதுவும் ஒன்றாக உள்ளது.

திட்டத்தின் தற்போதைய நிலை என்ன? அதை நிறைவேற்றுவதற்கான நிர்வாக, தொழில்நுட்ப மற்றும் மாநிலங்களுக்கு இடையிலான நடைமுறைச் சிக்கல்கள் என்ன? திட்டம் தொடர்பாக அரசு எத்தகைய நடவடிக்கைகளை மேற்கொண்டுள்ளது?

இந்தக் கேள்விகளுக்கு அரசு தெளிவான விளக்கம் அளிக்க வேண்டும் என்பதே விவசாயிகளின் எதிர்பார்ப்பு.

தென்னை மரங்களைக் காப்பாற்றத் தண்ணீரை விலைக்கு வாங்கும் விவசாயிகள்!

நிலத்தடி நீராதாரங்கள் உள்ள பகுதிகளில் விவசாயம் தொடர்ந்தாலும், தண்ணீர்ப் பற்றாக்குறை பெரும் சுமையாக மாறியுள்ளதாக விவசாயிகள் கூறுகின்றனர்.

குறிப்பாகத் தென்னை சாகுபடியில் ஈடுபட்டுள்ள சில விவசாயிகள், மரங்களைக் காப்பாற்றுவதற்கே தண்ணீரை விலைக்கு வாங்க வேண்டியிருப்பதாகத் தெரிவிக்கின்றனர். சில நேரங்களில் பணம் கொடுத்தாலும் தேவையான அளவு தண்ணீர் கிடைப்பதில்லை என்பதும் அவர்களின் வேதனை.

இதேபோல், காற்றாலைகள் அதிகம் அமைந்துள்ள சில பகுதிகளிலும் நிலத்தடி நீர்மட்டம் குறைந்துள்ளதாக உள்ளூர் மக்கள் தெரிவிக்கின்றனர். இதுகுறித்தும் ஆய்வு செய்வது அவசியம்.

குடிநீருக்கும் நீராதாரப் பாதுகாப்பு தேவை!

அமராவதி மற்றும் சண்முக நதிகளில் நீர்வரத்து குறையும் காலங்களில் தாராபுரத்தின் பல பகுதிகளில் குடிநீர்த் தேவையைச் சமாளிப்பதும் சிரமமாகிறது என மக்கள் தெரிவிக்கின்றனர்.

மேற்கு, வடமேற்கு மற்றும் வடக்குப் பகுதிகளில் காவிரி கூட்டுக் குடிநீர்த் திட்டம், உள்ளூர் குடிநீர்த் திட்டங்கள் மற்றும் நிலத்தடி நீராதாரங்களை மக்கள் நம்பியுள்ளனர்.

நீர்ப்பாசனத் திட்டங்கள் மட்டுமல்லாமல், குடிநீர் வழங்கல், நிலத்தடி நீர் செறிவூட்டல், மழைநீர் சேமிப்பு ஆகியவற்றையும் ஒருங்கிணைத்த நிரந்தரத் திட்டம் தேவை என்பதே இப்பகுதி மக்களின் கோரிக்கை.

மின்தடை குறித்தும் பதில் எதிர்பார்ப்பு!

விவசாயத்திற்கும் குடிநீர் விநியோகத்திற்கும் மின்சாரம் இன்றியமையாததாக உள்ளது.

இந்த நிலையில், மின்தடை மற்றும் மின்விநியோகச் சிக்கல்கள் குறித்தும் முதலமைச்சர் தெளிவான விளக்கம் அளிக்க வேண்டும் எனத் தொகுதி மக்கள் எதிர்பார்க்கின்றனர்.

மின் விநியோகத்தை மேம்படுத்துவதற்கான திட்டங்கள், விவசாய மின் இணைப்புகள் மற்றும் மின்கட்டமைப்பு வசதிகள் குறித்த அறிவிப்புகளும் முக்கியத்துவம் பெறுகின்றன.

சத்தியபாமாவின் கட்சி மாற்றம்: வாக்காளர்கள் எப்படி பார்க்கிறார்கள்?

இடைத்தேர்தலில் பேசப்படும் மற்றொரு விவகாரம், அதிமுக சார்பில் போட்டியிட்டு வெற்றி பெற்ற சத்தியபாமா பின்னர் தமிழக வெற்றிக் கழகத்தில் இணைந்தது.

தேர்தலில் வெற்றி பெற்ற சில நாட்களிலேயே அவர் கட்சி மாறியதாகக் கூறி, அதிமுகவினர் மத்தியில் மட்டுமல்லாமல் 40 வயதுக்கு மேற்பட்ட மூத்தவர்கள் பலரிடமும், தொகுதியில் பரவலாக அதிருப்தி இருப்பதைத் தமிழ் ஊடகத்தின் களச் செய்தியாளர் குழுவினர் கண்டறிந்துள்ளனர்.

மூன்று ஒன்றியங்களிலும் சந்தித்த சில வாக்காளர்கள், குறிப்பாக நடுத்தர வயது மற்றும் மூத்த வாக்காளர்கள் மத்தியில், இந்தக் கட்சி மாற்றம் குறித்த கேள்விகள் எழுப்பப்படுகின்றன.

அருந்ததியர் மற்றும் சிறுபான்மையின மக்களின் எதிர்பார்ப்புகள்!

பட்டியலின மக்களுக்காக ஒதுக்கப்பட்ட தாராபுரம் தொகுதியில் அருந்ததியர் உள்ளிட்ட பல்வேறு சமூகங்களைச் சேர்ந்த மக்களின் வாழ்வாதாரம், கல்வி, வேலைவாய்ப்பு, குடியிருப்பு வசதி மற்றும் அடிப்படை உள்கட்டமைப்பு தொடர்பான கோரிக்கைகளும் முக்கியமானவை.

அதேபோல், இஸ்லாமியர் மற்றும் கிறித்தவ மக்களின் தேவைகள், அவர்களுக்கான நலத்திட்டங்கள் குறித்த எதிர்பார்ப்புகளும் களத்தில் முன்வைக்கப்படுகின்றன.

இந்தக் கோரிக்கைகள் தொடர்பாக முதலமைச்சர் என்ன அறிவிப்புகளை வெளியிடுகிறார் என்பதும் கவனிக்கப்படுகிறது.

செப்டம்பர் 30: முதலமைச்சர் விஜய் என்ன சொல்லப் போகிறார்?

தாராபுரம் தொகுதியில் செப்டம்பர் 30 அன்று பிரச்சாரம் மேற்கொள்ளவுள்ள முதலமைச்சர் விஜயிடம், நீர்ப்பாசனப் பிரச்சினைகளுக்கான நிரந்தரத் தீர்வு குறித்த அறிவிப்புகளை மக்கள் எதிர்பார்க்கின்றனர்.

குறிப்பாக உப்பாறு அணை, நல்லதங்காள் அணைக்கட்டு, ஆனைமலையாறு–நல்லாறு திட்டம் ஆகியவை தொடர்பாக அவர் முன்வைக்கும் திட்டங்களும் உறுதிமொழிகளும் கவனிக்கப்படும்.

அதோடு, குடிநீர், மின்விநியோகம், விவசாயிகளின் வாழ்வாதாரம், சமூக நலத்திட்டங்கள் ஆகியவற்றுக்கும் என்ன பதில் கிடைக்கிறது என்பது முக்கியமான கேள்வியாக உள்ளது.

கடந்த 100 நாட்களுக்கும் மேலான அரசின் செயல்பாடுகள், தாமதமாகும் சில அறிவிக்கப்பட்ட திட்டங்கள், அடுத்து வரும் காலத்தில் நாம் அறிவித்த எதையும் கைவிடமாட்டோம் உள்ளிட்ட அரசின் உறுதிகளும் தாராபுரம் தொகுதி மக்களின் எதிர்பார்ப்புகளாக உள்ளன.