இயக்குநர் கே. பாக்யராஜ் மறைவு: அரசியல் தலைவர்கள், திரையுலகினர் இரங்கல் | முழு விவரம்

தமிழ் திரையுலகின் "திரைக்கதை மன்னன்" என்று போற்றப்படும் இயக்குநர், நடிகர், திரைக்கதை ஆசிரியர் மற்றும் தயாரிப்பாளர் கே. பாக்யராஜ் (73) இன்று (27.06.2026) காலை திடீர் மாரடைப்பால் காலமானார். அவரது மறைவு தமிழ்த் திரையுலகையும், ரசிகர்களையும் ஆழ்ந்த சோகத்தில் ஆழ்த்தியுள்ளது.

பாரதிராஜாவின் உதவி இயக்குநராகத் தனது திரைப் பயணத்தைத் தொடங்கிய பாக்யராஜ், பின்னர் தனித்துவமான திரைக்கதை, எளிய நகைச்சுவை, குடும்ப உறவுகளை மையமாகக் கொண்ட திரைப்படங்கள் மூலம் தமிழ்த் திரையுலகில் தனக்கென ஒரு இடத்தை உருவாக்கினார். இயக்குநர், நடிகர், எழுத்தாளர், தயாரிப்பாளர் என பன்முகத் திறமையுடன் அரை நூற்றாண்டுக்கும் மேலாக திரைப்பட உலகிற்கு பங்களித்தவர்.

இரங்கல் தெரிவித்தவர்கள்

பாக்யராஜின் மறைவுக்கு அரசியல் தலைவர்கள், திரைத்துறையினர் மற்றும் பல்வேறு அமைப்புகள் இரங்கல் தெரிவித்து வருகின்றன.

முதலமைச்சர் திரு. ச.ஜோசப் விஜய்

முதலமைச்சர் திரு. ச.ஜோசப் விஜய் இயக்குநர் மற்றும் நடிகர் திரு. கே. பாக்யராஜ் அவர்களின் இல்லத்திற்கு நேரில் சென்று அவரது உடலுக்கு மலர்மாலை வைத்து அஞ்சலி செலுத்தி, குடும்பத்தினருக்கு ஆறுதல் கூறினார்

மு.க. ஸ்டாலின்

திமுக தலைவர் மு.க. ஸ்டாலின் வெளியிட்ட இரங்கல் செய்தியில், "ஆசான் மறைந்த சில வாரங்களிலேயே அவரது மாணவரையும் தமிழ்த் திரையுலகம் இழந்துள்ளது. இந்திய சினிமாவின் சிறந்த திரைக்கதை ஆசிரியர்களில் ஒருவராகவும், பல தலைமுறை இயக்குநர்களை உருவாக்கிய படைப்பாளராகவும் பாக்யராஜ் என்றென்றும் நினைவுகூரப்படுவார்" என்று தெரிவித்துள்ளார்.

எடப்பாடி கே. பழனிசாமி

அதிமுக பொதுச்செயலாளர் எடப்பாடி பழனிசாமி, "இயக்குநர், நடிகர், திரைக்கதை ஆசிரியர், இசையமைப்பாளர் என பன்முகத் திறமையுடன் விளங்கிய பாக்யராஜின் மறைவு தமிழ் திரையுலகிற்கு ஈடுசெய்ய முடியாத இழப்பு" என்று இரங்கல் தெரிவித்துள்ளார்.

தமிழ்நாடு ஆளுநர்

தமிழ்நாடு ஆளுநர் ராஜேந்திர அர்லேகர் தனது இரங்கல் செய்தியில், பாக்யராஜின் தனித்துவமான கதை சொல்லும் திறனும், தமிழ் சினிமாவிற்கு அவர் ஆற்றிய பங்களிப்பும் என்றும் நினைவுகூரப்படும் என்றும், அவரது மறைவு திரையுலகிற்கு பேரிழப்பு என்றும் குறிப்பிட்டுள்ளார்.

காங்கிரஸ்

தமிழ்நாடு காங்கிரஸ் தலைவர் செல்வப்பெருந்தகையும் பாக்யராஜின் மறைவுக்கு ஆழ்ந்த இரங்கல் தெரிவித்து, அவரது குடும்பத்தினருக்கு ஆறுதல் தெரிவித்துள்ளார்.

நடிகர் ரஜினிகாந்த்

நடிகர் ரஜினிகாந்த் வெளியிட்டுள்ள இரங்கல் செய்தியில், "ஐம்பது ஆண்டு காலம் தமிழ்த் திரையுலகில் தன் அசாத்தியமான திறமையாலும், படைப்பாற்றலாலும் பல வெற்றிப் படங்களைக் கொடுத்து, தமிழ் மக்கள் மனதில் நீங்கா இடம் பிடித்தவர் நண்பர் திரு. பாக்யராஜ் அவர்கள். அவருடைய திடீர் மறைவு எனக்கு மிகுந்த வேதனையும், அதிர்ச்சியும் அளிக்கிறது. அவர் குடும்பத்தினருக்கும், சார்ந்தோருக்கும் என் ஆழ்ந்த அனுதாபங்கள். ஆத்மா சாந்தியடையட்டும்" என்று குறிப்பிட்டுள்ளார். 

ரசிகர்கள் அஞ்சலி

பாக்யராஜின் மறைவுச் செய்தி வெளியாகியதும், அவரது இல்லத்திலும் பின்னர் பொதுமக்கள் அஞ்சலிக்காக வைக்கப்பட்டிருந்த உடலுக்கும் ஏராளமான ரசிகர்கள், திரைப்படக் கலைஞர்கள் மற்றும் அரசியல் பிரமுகர்கள் நேரில் சென்று அஞ்சலி செலுத்தினர். இறுதிச்சடங்கு சென்னை பெசன்ட் நகர் மின் மயானத்தில் நடைபெறும் என தகவல் வெளியாகியுள்ளது.

மறக்க முடியாத திரைப்பயணம்

1970-களின் இறுதியில் இயக்குநராக அறிமுகமான பாக்யராஜ், முந்தானை முடிச்சு, அந்த 7 நாட்கள், தூரல் நின்னு போச்சு, டார்லிங் டார்லிங் டார்லிங், சின்ன வீடு, இது நம்ம ஆளு உள்ளிட்ட பல வெற்றிப்படங்களை வழங்கினார். எளிய மனிதர்களின் வாழ்க்கை, குடும்ப உறவுகள், நகைச்சுவை மற்றும் வலுவான திரைக்கதை அமைப்பு ஆகியவற்றின் மூலம் தமிழ்த் திரையுலகில் தனித்துவமான பாணியை உருவாக்கியவர்.

தமிழ்த் திரையுலகிற்கு பேரிழப்பு

பாரதிராஜாவின் மறைவுக்குப் பிறகு குறுகிய காலத்திலேயே அவரது முக்கிய மாணவரான பாக்யராஜும் மறைந்திருப்பது தமிழ்த் திரையுலகை மேலும் சோகத்தில் ஆழ்த்தியுள்ளது. அவரது படைப்புகள், திரைக்கதை நடை, வசனங்கள் மற்றும் திரைப்பட மொழி வருங்கால தலைமுறைக்கும் வழிகாட்டியாகத் தொடரும்.

தமிழ் ஊடகம் சார்பிலும் இயக்குநர் கே. பாக்யராஜ் அவர்களுக்கு ஆழ்ந்த இரங்கலைத் தெரிவித்துக் கொள்கிறோம். அவரது குடும்பத்தினருக்கும், நண்பர்களுக்கும், ரசிகர்களுக்கும் எங்களது ஆழ்ந்த அனுதாபங்களைத் தெரிவித்துக் கொள்கிறோம்.